Leiklistarverkefni

Leiklist

Í hverri viku eru skipulagðar leiklistarstundir. Í leiklistarstundunum vinna börnin leiklistarverkefni með kennara. Verkefnin eru afskaplega fjölbreytt s.s. búningar, andlitsmálun, sögulestur, töfratöskur, ævintýri og margt fleira skemmtilegt. Hver leiklistarstund er ein klukkustund en tímanum er skipt upp í eitt til þrjú verkefni. Skipulag í húsinu er miðað að þessum stundum enda teljum við þær vera hápunktur starfsemi skólans.

Sýna og sjá töskur

Börnin fara með töskur heim og velja einn hlut að heiman til að setja í hana. Þau sýna börnum hlutinn í samverustund og segja frá honum. Í þessu verkefni eru þau að æfa sig í að standa fyrir framan hóp, segja frá og fá spurningar úr sal. Yngstu börnin í leikskólanum taka líka þátt í þessu verkefni en fer þá minna fyrir frásögn en meira fyrir að standa fyrir hóp og vera miðpunkturinn.

Leiklistarvinastund

Á sex vikna fresti eru leiklistarvinastundir í sal. Fyrir þær æfa deildarnar atriði til að sýna öðrum deildum. Búið er til svið í leikgötu fyrir atriðin og koma öll börnin í leikskólanum fram í einhverju atriði.  Atriðin eru misjöfn  bæði eftir aldri og áhugasviði barnanna hverju sinni allt frá því að syngja lítið lag með einn fylgihlut, í litla leiksýningu með búningum og andlistmálningu.  Á degi leikskólans bjóðum við foreldra sérstaklega velkomna á leiklistarvinastund en auðvitað eru foreldrar alltaf velkomnir í leikslistarvinastund eins og aðrar stundir í leikskólanum.

Leiksýningar

Þrjár fastar leiksýningar eru fyrir börnin á hverjum vetri. Starfsfólkið setur upp eina sýningu, foreldrar elstu barna eru með sýningu á sumarhátíðinni og býður leikskólinn og foreldrafélagið börnum upp á jólasýningu fyrir jólin. Elstu árgöngum hefur verið boðið í Þjóðleikhúsið á sýningu einu sinni yfir veturinn.  Einnig höfum við farið með börnin í heimsókn í stóru leikhúsin að skoða aðstöðuna þar.